कोणता झेंडा घेऊ हाती?दोन दादांच्या राजकीय दरीत कार्यकर्त्यांची कोंडी

धाराशिव : महाराष्ट्राच्या राजकारणात सध्या शिवसेना (उद्धव बाळासाहेब ठाकरे) पक्षातील सहा खासदार वेगळा गट स्थापन करण्याच्या चर्चांना उधाण आले आहे. या चर्चांच्या पार्श्वभूमीवर धाराशिव जिल्ह्यातील, विशेषतः कळंब-धाराशिव विधानसभा मतदारसंघातील शिवसैनिकांमध्ये संभ्रमाचे वातावरण निर्माण झाले आहे.

या मतदारसंघात खासदार ओमराजे निंबाळकर आणि आमदार कैलास पाटील हे गेल्या अनेक वर्षांपासून एकत्रितपणे पक्षसंघटना मजबूत करण्याचे काम करत होते. त्यामुळे कार्यकर्त्यांनाही कोणत्याही दादाकडे जाणे सहज शक्य होते. मात्र, दोन्ही नेते राजकीयदृष्ट्या वेगळे मार्ग स्वीकारण्याची शक्यता निर्माण झाल्याने कार्यकर्त्यांसमोर मोठा प्रश्न उभा राहिला आहे.

खासदार ओमराजे निंबाळकर यांना वैयक्तिकरित्या मानणारा एक मोठा वर्ग आहे. लोकसभेचे प्रतिनिधित्व करताना त्यांनी मतदारसंघात निर्माण केलेला संपर्क आणि जनाधार आजही कायम आहे. दुसरीकडे, आमदार कैलास पाटील यांनी गेल्या सहा वर्षांत विधानसभा मतदारसंघात विकासकामे आणि सातत्यपूर्ण जनसंपर्काच्या माध्यमातून कार्यकर्त्यांशी घट्ट नाते निर्माण केले आहे.

यामुळे “कोणत्या दादांचा झेंडा हाती घ्यायचा?” हा प्रश्न अनेक शिवसैनिकांना सतावत आहे. जिल्ह्यातील इतर तालुक्यांमध्ये परिस्थिती तुलनेने स्पष्ट असली, तरी कळंब-धाराशिव विधानसभा मतदारसंघात मात्र कार्यकर्त्यांसाठी निर्णय घेणे अधिक कठीण ठरणार आहे.

सध्या खासदार ओमराजे निंबाळकर यांच्या संभाव्य राजकीय भूमिकेबाबत जोरदार चर्चा सुरू असली, तरी अद्याप कोणतीही अधिकृत घोषणा झालेली नाही. त्यामुळे पुढील दोन-तीन दिवसांत घडणाऱ्या राजकीय घडामोडींवरच संपूर्ण चित्र अवलंबून राहणार आहे.

दरम्यान, कार्यकर्त्यांमध्ये मात्र एकच चर्चा रंगली आहे—जर दोन दादांच्या वाटा वेगळ्या झाल्या, तर आपण कोणता झेंडा हाती घ्यायचा?