उस्मानाबाद–लातूर–बीड विधान परिषदेसाठी भाजपमध्ये मोर्चेबांधणी; सुनील चव्हाण आघाडीवर

धाराशिव : उस्मानाबाद–लातूर–बीड स्थानिक स्वराज्य संस्था मतदारसंघाच्या विधान परिषद निवडणुकीची रणधुमाळी सुरू होण्यापूर्वीच भाजपमध्ये इच्छुकांनी जोरदार मोर्चेबांधणी सुरू केली आहे. माजी मंत्री मधुकरराव चव्हाण यांचे सुपुत्र तथा सहकार क्षेत्रातील प्रभावी चेहरा म्हणून ओळख असलेले सुनील मधुकरराव चव्हाण यांनीही उमेदवारीसाठी ताकद लावल्याची चर्चा राजकीय वर्तुळात रंगू लागली आहे.

लातूर–बीड–धाराशिव या तिन्ही जिल्ह्यांत भाजपची स्थानिक स्वराज्य संस्थांमध्ये मोठी ताकद असल्याने ही निवडणूक पक्षासाठी प्रतिष्ठेची मानली जात आहे. नगरपालिकांपासून जिल्हा परिषदांपर्यंत भाजपचे संख्याबळ मजबूत असल्याने उमेदवारीसाठी अनेक दिग्गजांमध्ये चुरस निर्माण झाली आहे.

मागील स्थानिक स्वराज्य संस्था विधान परिषद निवडणुकीत भाजपचे उमेदवार सुरेश धस यांना विजयी करण्यासाठी सुनील चव्हाण यांनी महत्त्वाची भूमिका बजावल्याचे पक्षातील कार्यकर्ते सांगतात. लोकसभा निवडणुकीच्या तोंडावर भाजपमध्ये प्रवेश केल्यानंतर त्यांनी पूर्ण ताकदीने प्रचारात सहभाग घेतला होता.

२०२४ च्या विधानसभा निवडणुकीतही आमदार राणाजगजितसिंह पाटील यांच्या प्रचारात त्यांनी सक्रिय भूमिका निभावली. नगरपालिका, जिल्हा परिषद आणि पंचायत समिती निवडणुकांमध्ये भाजप उमेदवारांना निवडून आणण्यासाठी त्यांनी सातत्याने संघटनात्मक काम केल्याची चर्चा पक्षात आहे.

अणदूर येथील रहिवासी असलेले सुनील चव्हाण हे सहकार क्षेत्रात सक्रिय राहिले आहेत. जिल्हा मध्यवर्ती सहकारी बँक तसेच श्री तुळजाभवानी शेतकरी सहकारी साखर कारखाना, नळदुर्ग येथे त्यांनी संचालक आणि अध्यक्ष म्हणून काम पाहिले आहे. त्यामुळे सहकार आणि ग्रामीण राजकारणातील त्यांचा संपर्क मजबूत मानला जातो.

धाराशिव जिल्ह्यातून माजी मंत्री बसवराज पाटील, भाजप जिल्हाध्यक्ष दत्ता कुलकर्णी यांच्यासह आता सुनील चव्हाण यांच्या नावाचीही जोरदार चर्चा सुरू झाली आहे. केंद्रात आणि राज्यात भाजपची सत्ता असताना जिल्हा परिषद तसेच अनेक नगरपालिकांमध्येही पक्षाचे वर्चस्व कायम आहे. त्यामुळे पक्षश्रेष्ठी अखेर कोणत्या चेहऱ्यावर विश्वास दाखवतात, याकडे तिन्ही जिल्ह्यांचे लक्ष लागले आहे.

राजकीय समीकरणे, स्थानिक स्वराज्य संस्थांमधील मतांचे गणित आणि संघटनात्मक ताकद यांचा विचार करता भाजपमधील ही लढत आगामी काळात अधिकच रंगणार असल्याचे चित्र दिसत आहे.