स्थानिक स्वराज्य संस्था मतदारसंघातून डॉ.प्रतापसिंह पाटील यांना उमेदवारी देण्याची कार्यकर्त्यांची जोरदार मागणी

लातूर–बीड–धाराशिव स्थानिक स्वराज्य संस्था मतदारसंघाच्या निवडणुकीच्या पार्श्वभूमीवर राष्ट्रवादी काँग्रेस पक्ष (शरदचंद्र पवार गट) मध्ये राजकीय हालचालींना वेग आला असून, पक्षाचे प्रदेश सरचिटणीस डॉ. प्रतापसिंह पाटील यांना उमेदवारी द्यावी, अशी जोरदार मागणी कार्यकर्ते आणि पदाधिकाऱ्यांकडून पक्षाध्यक्ष शरद पवार यांच्याकडे करण्यात येत आहे.
स्थानिक स्वराज्य संस्था निवडणुकीचा कार्यक्रम जाहीर झाल्यानंतर राजकीय वातावरण तापले असून, २४ मे ते १ जून दरम्यान उमेदवारी अर्ज दाखल होणार आहेत. या पार्श्वभूमीवर महाविकास आघाडीकडून ही जागा राष्ट्रवादी काँग्रेस पक्षाला मिळावी आणि त्यासाठी डॉ. प्रतापसिंह पाटील यांनाच उमेदवारी जाहीर करावी, अशी मागणी अधिक तीव्र होताना दिसत आहे.
कार्यकर्त्यांचा डॉ. पाटील यांच्यावर विश्वास
डॉ. प्रतापसिंह पाटील यांचा धाराशिव, बीड आणि लातूर जिल्ह्यांत व्यापक जनसंपर्क असून स्थानिक स्वराज्य संस्थांमधील पदाधिकारी व सदस्यांमध्ये त्यांचे मजबूत नेटवर्क असल्याचे बोलले जात आहे. मागील निवडणुकीत ही जागा राष्ट्रवादी काँग्रेसकडे होती. त्यामुळे यावेळीही योग्य उमेदवार दिल्यास ही जागा कायम राखता येईल, असा विश्वास कार्यकर्त्यांकडून व्यक्त केला जात आहे.
संघटनात्मक ताकद आणि नेतृत्व
महाविकास आघाडीकडून संघटनात्मक ताकद, व्यापक जनसंपर्क आणि सक्षम नेतृत्व असलेला उमेदवार दिल्यास विजय निश्चित होऊ शकतो, असे मत पक्षांतर्गत व्यक्त होत आहे. डॉ. प्रतापसिंह पाटील यांनी प्रतिकूल परिस्थितीतही धाराशिव जिल्ह्यात राष्ट्रवादी काँग्रेस पक्ष मजबूत ठेवण्यात महत्त्वाची भूमिका बजावली आहे.
त्यांनी जिल्ह्यात मोठ्या प्रमाणावर पदाधिकारी आणि कार्यकर्त्यांच्या नियुक्त्या करून सक्षम संघटन उभे केले. तसेच धाराशिव नगरपालिकेत आठ नगरसेवक निवडून आणण्यातही त्यांचा मोलाचा वाटा असल्याचे कार्यकर्ते सांगतात.
२०१९ च्या पार्श्वभूमीवर सहानुभूती
२०१९ च्या विधानसभा निवडणुकीत पक्षाकडून त्यांच्यावर अन्याय झाल्याची भावना आजही अनेक समर्थक आणि कार्यकर्त्यांमध्ये असल्याचे दिसून येते. त्यामुळे यावेळी पक्ष नेतृत्वाने त्यांना संधी दिल्यास ते महाविकास आघाडीच्या माध्यमातून विजय मिळवू शकतात, असा विश्वास त्यांच्या समर्थकांकडून व्यक्त केला जात आहे.
उमेदवारीकडे सर्वांचे लक्ष
लातूर–बीड–धाराशिव स्थानिक स्वराज्य संस्था मतदारसंघासाठी महाविकास आघाडीकडून उमेदवारी कोणाला मिळणार, याकडे आता राजकीय वर्तुळाचे लक्ष लागले असून, डॉ. प्रतापसिंह पाटील यांच्या नावाची चर्चा सध्या जोरात सुरू आहे.