१५ व्या वित्त आयोगाच्या निधीचे समन्यायी वाटप करा-जिल्हा परिषद शिवसेना गटनेते विकी चव्हाण यांची मागणी

धाराशिव, दि. १७ जून २०२६ : जिल्हा परिषद धाराशिवच्या १५ व्या वित्त आयोगाच्या विकास निधीचे वाटप सर्व जिल्हा परिषद गटांना समानतेने व स्थानिक गरजांनुसार करण्यात यावे, अशी मागणी शिवसेना जिल्हा परिषद सदस्य तथा शिवसेना गटनेते विकी संगीता सोमनाथ चव्हाण यांनी मुख्य कार्यकारी अधिकारी, जिल्हा परिषद धाराशिव यांच्याकडे निवेदनाद्वारे केली आहे.

निवेदनात नमूद करण्यात आले आहे की, जिल्हा परिषद सर्वसाधारण सभेमध्ये १५ व्या वित्त आयोगाच्या १० टक्के विकास निधीचे नियोजन करताना काही विशिष्ट जिल्हा परिषद गटांमध्येच शौचालय बांधकाम अथवा इतर मर्यादित कामांसाठी निधी खर्च करण्याचा निर्णय घेण्यात आल्याचे समजते. हा निधी संपूर्ण जिल्ह्यासाठी प्राप्त होत असल्याने त्याचे वाटप नैसर्गिक न्यायाच्या तत्त्वानुसार सर्व गटांना समसमान व पारदर्शक पद्धतीने होणे आवश्यक आहे.

विकी चव्हाण यांनी निवेदनात म्हटले आहे की, प्रत्येक जिल्हा परिषद गटाच्या समस्या व विकासाच्या गरजा वेगवेगळ्या असतात. काही ठिकाणी रस्ते, काही ठिकाणी पिण्याच्या पाण्याची व्यवस्था, तर काही भागांमध्ये आरोग्य सुविधांची गरज अधिक असते. त्यामुळे केवळ एका प्रकारच्या कामांसाठी निधी खर्च करण्याऐवजी स्थानिक लोकप्रतिनिधींकडून विकासकामांचे प्रस्ताव मागवून त्या-त्या भागातील गरजांनुसार निधी उपलब्ध करून देणे आवश्यक आहे.

गेल्या चार वर्षांपासून जिल्हा परिषदेत प्रशासकीय राजवट असल्यामुळे स्थानिक लोकप्रतिनिधींच्या माध्यमातून जनतेच्या समस्या प्रशासनापर्यंत प्रभावीपणे पोहोचल्या नसल्याचेही त्यांनी नमूद केले. परिणामी ग्रामीण भागातील अनेक विकासकामे प्रलंबित राहिली असल्याचे त्यांनी सांगितले.

त्यामुळे १५ व्या वित्त आयोगाच्या निधीचे सर्व जिल्हा परिषद गटांमध्ये त्यांच्या क्षेत्रफळ व लोकसंख्येच्या प्रमाणात समन्यायी वाटप करण्यात यावे. तसेच विकासकामांचे नियोजन करताना स्थानिक लोकप्रतिनिधींच्या शिफारशी व स्थानिक गरजांना प्राधान्य देण्यात यावे, जेणेकरून जिल्ह्याचा सर्वांगीण व समतोल विकास साधता येईल, अशी मागणी विकी चव्हाण यांनी केली आहे.

या निवेदनास जिल्हा परिषद सदस्यांसह विविध लोकप्रतिनिधींनी पाठिंबा दर्शविला आहे. निवेदनावर सर्व जिल्हा परिषद सदस्य व सदस्या सीमा माडजे, सविता विकास तळेकर, अश्विनी सुनील उंदरे, विजयमाला मार्कड, जयश्री बालाजी काळे,साधना बापूसाहेब अंधारे,वैशाली चंद्रकांत डोके,अमर सुभाषराव मोरे,अजित भागवत लाकाळ आणि सुवर्णा सतीश पाटील यांच्या स्वाक्षऱ्या आहेत.