शिवसेनेत सुरज साळुंखे यांच्यावर मोठी जबाबदारी

शिवसेनेचे युवा नेते सुरज राजाभाऊ साळुंके यांच्यावर पक्षाने मोठी जबाबदारी सोपवत धाराशिव लोकसभा सहसंपर्कप्रमुखपदी नियुक्ती केली आहे. शिवसेना पक्षप्रमुख तथा राज्याचे उपमुख्यमंत्री एकनाथ शिंदे यांच्या मार्गदर्शनाखाली धाराशिव लोकसभा मतदारसंघात पक्ष संघटन अधिक मजबूत करण्यासाठी नव्या जोमाने कार्य करणार असल्याची प्रतिक्रिया साळुंके यांनी व्यक्त केली.
मुंबई येथील शिवसेना मध्यवर्ती कार्यालयात झालेल्या कार्यक्रमात शिवसेना नेते तथा धाराशिवचे पालकमंत्री प्रताप सरनाईक यांच्या हस्ते नियुक्तीपत्र प्रदान करण्यात आले. शिवसेना सचिव संजय मोरे यांच्या स्वाक्षरीचे नियुक्तीपत्र साळुंके यांना देण्यात आले.

नियुक्तीपत्रात हिंदुहृदयसम्राट बाळासाहेब ठाकरे यांच्या हिंदुत्ववादी विचारांचा आणि धर्मवीर आनंद दिघे यांच्या शिकवणीचा प्रचार-प्रसार करण्याचे आवाहन करण्यात आले आहे. तसेच सर्व शिवसैनिकांना सोबत घेऊन पक्ष वाढीसाठी सक्रियपणे कार्य करण्याच्या सूचना देण्यात आल्या आहेत.
सुरज राजाभाऊ साळुंके यांनी यापूर्वी धाराशिव जिल्हाप्रमुख म्हणून काम करताना धाराशिव-कळंब विधानसभा मतदारसंघात शिवसेनेचे संघटन मोठ्या प्रमाणात वाढवले आहे. जुन्या आणि नव्या शिवसैनिकांमध्ये समन्वय साधत त्यांनी युवा कार्यकर्त्यांची मजबूत फळी उभी केली. त्यांच्या नेतृत्वाखाली पक्ष संघटनाला नवी उभारी मिळाल्याचे मानले जाते.

त्यांच्या या नियुक्तीमुळे धाराशिव लोकसभा मतदारसंघात शिवसेनेचे संघटन आणखी बळकट होईल, असा विश्वास शिवसैनिकांकडून व्यक्त करण्यात येत असून, त्यांच्या निवडीचे पक्ष कार्यकर्त्यांकडून स्वागत करण्यात येत आहे.