सोनारी जि.प. शाळेत गणित व विज्ञान शिक्षकांची तातडीने नियुक्ती; विद्यार्थ्यांच्या भवितव्यासाठी प्रशासनाची युद्धपातळीवरील कार्यवाही

परंडा तालुक्यातील जिल्हा परिषद प्राथमिक शाळा, सोनारी येथे गणित व विज्ञान विषयांच्या शिक्षकांची पदे दीर्घकाळ रिक्त असल्यामुळे विद्यार्थ्यांच्या शिक्षणावर गंभीर परिणाम होत होता. विद्यार्थ्यांचे शैक्षणिक नुकसान होत असल्याची माहिती मिळताच आमदार प्रा. डॉ. तानाजीराव सावंत यांनी या प्रकरणाची तात्काळ दखल घेत प्रशासनाला कठोर शब्दांत सूचना दिल्या. त्यांच्या एका दूरध्वनीनंतर अवघ्या २४ तासांच्या आत शाळेत दोन्ही विषयांच्या शिक्षकांची नियुक्ती करण्यात आली.

सोनारी येथील विद्यार्थ्यांना गणित व विज्ञान या महत्त्वाच्या विषयांचे नियमित अध्यापन मिळत नसल्याने पालकांमध्येही नाराजीचे वातावरण होते. ही बाब समोर येताच आमदार डॉ. तानाजीराव सावंत यांनी धाराशिवचे जिल्हा प्राथमिक शिक्षणाधिकारी रवींद्र खंदारे यांच्याशी दूरध्वनीवरून संपर्क साधत परिस्थितीची सविस्तर माहिती घेतली.

यावेळी विद्यार्थ्यांच्या शिक्षणाशी कोणतीही तडजोड सहन केली जाणार नाही, असा स्पष्ट इशारा देत त्यांनी गणित व विज्ञान विषयांच्या शिक्षकांची तातडीने नियुक्ती करण्याचे निर्देश दिले. त्यांच्या सूचनेनंतर जिल्हा परिषद प्रशासन, मुख्य कार्यकारी अधिकारी आणि शिक्षण विभागाने युद्धपातळीवर कार्यवाही करत अवघ्या २४ तासांत शिक्षकांची नियुक्ती पूर्ण केली.

या तातडीच्या निर्णयामुळे सोनारी येथील विद्यार्थ्यांना मोठा दिलासा मिळाला असून, शाळेतील अध्यापनाची नियमितता पुन्हा पूर्ववत झाली आहे. पालक आणि ग्रामस्थांनीही प्रशासनाच्या त्वरित प्रतिसादाबद्दल समाधान व्यक्त केले आहे.

“विद्यार्थ्यांचे शिक्षण आणि त्यांचे भविष्य ही शासनाची सर्वोच्च जबाबदारी आहे. शिक्षकांच्या रिक्त पदांमुळे एका विद्यार्थ्याचेही शैक्षणिक नुकसान होऊ देणार नाही. शिक्षणाच्या गुणवत्तेबाबत कोणतीही तडजोड सहन केली जाणार नाही. ज्या ठिकाणी अशा समस्या निर्माण होतील, त्या तातडीने सोडवण्यासाठी प्रशासनाने संवेदनशीलतेने काम करावे. प्रत्येक विद्यार्थ्याला दर्जेदार शिक्षण मिळावे, यासाठी मी कायम कटिबद्ध असून आवश्यक तेथे तत्काळ हस्तक्षेप करत राहीन.”

आमदार प्रा.डॉ.तानाजीराव सावंत