युट्यूबवर‘कलवरी’चा विक्रम;10 लाख व्ह्यूज पार,भूमच्या निर्मात्याचा अभिमान

मराठी चित्रपट कलवरी हा थिएटरनंतर आता डिजिटल प्लॅटफॉर्मवरही सुपरहिट ठरत आहे. 28 नोव्हेंबर 2025 रोजी महाराष्ट्रभर प्रदर्शित झालेल्या या चित्रपटाला प्रेक्षकांचा चांगला प्रतिसाद मिळाला होता. त्यानंतर 14 मार्च रोजी YouTube वरील Raafilms चॅनलवर रिलीज करण्यात आल्यानंतर या चित्रपटाने लोकप्रियतेची नवी उंची गाठली आहे.

अवघ्या काही दिवसांतच ‘कलवरी’ने 10 लाख (1 मिलियन) व्ह्यूजचा टप्पा पार करत युट्यूबवरही आपली छाप पाडली आहे. ग्रामीण जीवनाचे अस्सल आणि वास्तवदर्शी चित्रण, प्रभावी कथानक आणि कलाकारांचा सहजसुंदर अभिनय यामुळे प्रेक्षक मोठ्या प्रमाणात चित्रपटाकडे आकर्षित होत आहेत.
या चित्रपटाचे निर्माते विकास कुटे हे सोनगिरी (ता. भूम) येथील रहिवासी असून, त्यांनी उच्च शिक्षण घेतले आहे. लहानपणापासूनच चित्रपट निर्मितीची आवड असलेल्या विकास कुटे यांनी ‘कलवरी’च्या माध्यमातून आपले स्वप्न साकार केले आहे. त्यांचा स्वतःचा प्रवास ग्रामीण भागातून झाल्यामुळे चित्रपटात त्यांनी अत्यंत वास्तवदर्शी दृश्ये उभी केली आहेत, ज्यामुळे प्रेक्षकांना गावाकडच्या जीवनाचा खरा अनुभव मिळतो.

चित्रपटाचे इतर निर्माते राणी टोणगे असून, दिग्दर्शन प्रदीप टोनगे आणि मंगेश शेंडगे यांनी केले आहे. निर्माते विकास कुटे यांनी सांगितले की, युट्यूबवरील प्रेक्षकांच्या सकारात्मक प्रतिक्रिया वाचताना भावनिक वाटते आणि नव्या चित्रपट निर्मितीसाठी प्रेरणा मिळते.
चित्रपटात राहूल दराडे, राजेश्वरी खरात, सुजित चौरे, अंकिता राऊत, सिद्धेश्वर झाडबुके यांच्यासह सत्तरपेक्षा अधिक कलाकारांनी भूमिका साकारल्या आहेत.
तसेच, चित्रपटाच्या निर्मितीत स्थानिक ग्रामस्थांचेही मोठे योगदान लाभले आहे. विशेषतः सोनगिरी (ता. भूम) आणि पिंपळगाव कवडा येथील ग्रामस्थांनी सहकार्य केले.
निर्माते विकास कुटे यांनी धाराशिव जिल्ह्यातील नागरिकांना आवाहन केले आहे की, “हा चित्रपट थिएटरमध्ये पाहणे अपेक्षित होते; मात्र आता किमान आपल्या भागातील निर्मात्याचा हा चित्रपट युट्यूबवर तरी सर्वांनी पाहावा.”
एकंदर, ‘कलवरी’ हा चित्रपट स्थानिक पातळीवर तयार होऊन राज्यभर गाजत असून, आता डिजिटल माध्यमातही मोठे यश मिळवत आहे.