भाजपामध्ये पक्ष प्रवेश करून येताना जिल्हा परिषद सदस्य धनंजय सावंत यांच्या गाडीचा भीषण अपघात; थोडक्यात बचाव

माजी आरोग्यमंत्री आमदार तानाजी सावंत यांचे पुतणे तथा जिल्हा परिषदेचे माजी उपाध्यक्ष, जिल्हा परिषद सदस्य धनंजय सावंत यांच्या गाडीचा भीषण अपघात झाल्याची घटना समोर आली आहे. मुंबई येथे भारतीय जनता पक्षात प्रवेश करून धाराशिवकडे परतत असताना हा अपघात घडला.
मिळालेल्या माहितीनुसार, सोलापूर-पुणे महामार्गावर भिगवणजवळ मध्यरात्री सुमारे १ वाजण्याच्या सुमारास धनंजय सावंत यांच्या फॉर्च्यूनर कारला भरधाव कंटेनरने जोरदार धडक दिली. या अपघातात कारचे मोठे नुकसान झाले.
मात्र सुदैवाने या भीषण अपघातात कोणतीही जीवितहानी झाली नाही. धनंजय सावंत सुखरूप बचावले असून त्यांचे पुत्र, चालक आणि सुरक्षारक्षक किरकोळ जखमी झाले आहेत. सर्व जखमींना तात्काळ उपचारासाठी जवळच्या रुग्णालयात दाखल करण्यात आले.
दरम्यान, काल मुंबई येथे धनंजय सावंत यांच्या पत्नींसह समर्थकांनी शिवसेना सोडून भाजपमध्ये प्रवेश केला होता. हा कार्यक्रम आटोपून परत येत असताना हा अपघात घडला.
या प्रसंगी धनंजय सावंत यांनी “ईश्वराची कृपा आणि कार्यकर्त्यांच्या शुभेच्छांमुळेच आपण सुरक्षित आहोत,” अशी भावना व्यक्त केली. या घटनेमुळे परिसरात काही काळ तणावाचे वातावरण निर्माण झाले होते.